ಹಿಂದೀ ಸ್ವದೇಶಿ, ಇಂಗ್ಲೀಷ್ ಪರದೇಶಿ ಅನ್ನೋದೂ ಒಂದು ತಂತ್ರ!

mujafar

ಮೊನ್ನೆ ನಡೆದ ಪುಸ್ತಕ ಬಿಡುಗಡೆ ಕಾರ್ಯಕ್ರಮದಲ್ಲಿ ಮಾತನಾಡಿದ ಪದ್ಮಶ್ರೀ ಪ್ರಶಸ್ತಿ ವಿಜೇತರಾದ ಶ್ರೀ ಮುಜಫರ್ ಹುಸೇನ್ ಅವರ ಮಾತುಗಳನ್ನು ನೋಡಿದಾಗ ಈ ಮಂದಿ ಹಿಂದೀ ಪ್ರಚಾರಕ್ಕೆ ಯಾವ ವೇದಿಕೆಯಾದರೂ ಸರಿ, ಯಾವ ನೆಪವಾದರೂ ಸರಿ.. ಸಿಕ್ಕ ಅವಕಾಶ ಬಿಡದೆ ಮರುಳು ಮಾಡೋಕೆ ಮುಂದಾಗ್ತಾರೆ ಅನ್ನಿಸಿತು!

ಸುಳ್ಳಿನ ಸರಮಾಲೆ!

ಇಂಗ್ಲೀಷು ಕನ್ನಡದ ದೊಡ್ಡಶತ್ರು. ಹಿಂದೀ ಸೋದರಿ ಭಾಷೆ. ಸಂಸ್ಕೃತ ಹೃದಯದ ಭಾಷೆ, ತಾಯಿ ಭಾಷೆ ಎಂದೆಲ್ಲಾ ಆಣಿಮುತ್ತು ಉದುರಿಸಿದ್ದಾರೆ. ಸಂಸ್ಕೃತದ ಹಿರಿಮೆಯನ್ನು ಕೊಂಡಾಡುತ್ತಾ ಸಂಸ್ಕೃತವನ್ನು ಭಾರತದ ಎಲ್ಲಾ ಭಾಷೆಗಳ ತಾಯಿ ಎನ್ನುವ ಹಸಿ ಹಸಿ ಸುಳ್ಳನ್ನು ಹರಿಯಬಿಟ್ಟಿರುವ ಮುಜಫರ್ ಹುಸೇನ್ ಸಾಹೇಬರು, ಭಾರತೀಯ ಭಾಷೆಗಳಲ್ಲಿರುವ ಸಂಸ್ಕೃತ ಪದಗಳನ್ನು ತೆಗೆದು ಹಾಕಿದರೆ ಅವು ಭಾಷೆ ಎನ್ನಿಸಿಕೊಳ್ಳುವುದಿಲ್ಲ ಎಂದಿದ್ದಾರೆ. ಆ ಮೂಲಕ ಕನ್ನಡಕ್ಕೆ ಸಂಸ್ಕೃತವನ್ನು ಎದುರಾಳಿಯಾಗಿ ನಿಲ್ಲಿಸುವ ಬೇಡದ ಮಾತಾಡಿದ್ದಾರೆ. ಈ ಮೆರೆಸುವಿಕೆ ಮುಂದುವರೆಸುತ್ತಾ ಸಂಸ್ಕೃತವನ್ನು ಹೃದಯದ ಭಾಷೆ ಎಂದು ಕರೆದಿದ್ದಾರೆ. ಜೊತೆಗೆ ಇಂಗ್ಲೀಷ್ ಇಲ್ಲದೆ ಜೀವಿಸಬಹುದು, ನಿಮ್ಮ ತಾಯ್ನುಡಿಯ ನಂತರದ ಸ್ಥಾನವನ್ನು ಹಿಂದೀಗೆ ಕೊಡಿ ಎಂದು ಬೇತುಕೊಂಡಿದ್ದಾರೆ. ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೂ ಹಿಂದೀಯನ್ನು ಅರ್ಥಮಾಡಿಕೊಳ್ಳುತ್ತಾರೆ ಅದಕ್ಕಾಗಿ ಹಿಂದೀಯನ್ನು ಹೆಚ್ಚೆಚ್ಚು ಬಳಸಿ ಎಂದು ಸಲಹೆ ನೀಡಿದ್ದಾರೆ.

ಎದುರಾಳಿ ನಿಲ್ಲಿಸುವ ಹುಚ್ಚು!

ನಿಜವಾಗಿ ನೋಡಿದರೆ ಇಂಗ್ಲೀಷು ಕನ್ನಡಿಗರಿಗೆ ಶತ್ರುವೂ ಅಲ್ಲ, ಹಿಂದೀ ಸೋದರಿಯೂ ಅಲ್ಲ, ಸಂಸ್ಕೃತ ತಾಯಿಯೂ ಅಲ್ಲ. ಎಲ್ಲವೂ ಭಾಷೆಗಳು ಅಷ್ಟೆ. ಕನ್ನಡಿಗರಿಗೆ ಕನ್ನಡವಲ್ಲದ ಬೇರೆಲ್ಲಾ ನುಡಿಗಳೂ ಪರಕೀಯವೇ! ವಾದ ಮಾಡುವವರು ಅದು ಶತ್ರು, ನಮ್ಮದು ಸೋದರಿ ಅದಕ್ಕಾಗಿ ನಮ್ಮ ನುಡಿಯನ್ನು ಒಪ್ಪಿಕೊಳ್ಳಿ ಅನ್ನುತ್ತಾರೆ ಎಂದರೆ ಅದರಲ್ಲಿ ಖಂಡಿತವಾಗಿಯೂ ಹುನ್ನಾರವಿದೆ ಎಂದೇ ಅರ್ಥ. ಯಾಕೆಂದರೆ ಜನರು ಸ್ವಾಭಾವಿಕವಾಗಿ ತಮಗೆ ಅನುಕೂಲಕರವಾದ ಭಾಷೆಯನ್ನು ಬಳಸುತ್ತಾರೆ. ನಾಡಿನ ಸರ್ಕಾರಗಳು ಜನರ ನುಡಿಯಲ್ಲಿ ಹೆಚ್ಚೆಚ್ಚು ಸೇವೆಗಳನ್ನು ಒದಗಿಸುವುದು ಜನರಿಗೆ ಮಾಡಬಹುದಾದ ಬಹುದೊಡ್ಡ ಉಪಕಾರ ಎನ್ನಬಹುದು.

ಕನ್ನಡದಿಂದ ಸಂಸ್ಕೃತವನ್ನು ತೆಗೆದು ಹಾಕುವ ಕಲ್ಪನೆಯೇ ಹುಚ್ಚುತನದ್ದು! ವಾಸ್ತವವಾಗಿ ಯಾವ ಭಾಷೆಯೂ ಬೇರೆ ಭಾಷೆಗಳಿಂದ ಎರವಲು ಪದಗಳನ್ನು ಪಡೆಯದೇ ಇರಲು ಸಾಧ್ಯವೇ ಇಲ್ಲ. ಕನ್ನಡದಿಂದ ಸಂಸ್ಕೃತವನ್ನೋ, ಪರ್ಷಿಯಾ ನುಡಿಯ ಪದಗಳನ್ನೋ ಇಂಗ್ಲೀಷನ್ನೋ ತೆಗೆದು ಹಾಕಬೇಕೆನ್ನುವುದೇ ಮೂರ್ಖತನ! ಆದರೆ ಕನ್ನಡದಲ್ಲಿ ಸಂಸ್ಕೃತ ಪದಗಳಿವೆ ಎನ್ನುವ ಕಾರಣಕ್ಕೆ (ಎಷ್ಟು ಪದಗಳಿವೆ, ಆಡು ಮಾತಲ್ಲಿ ಎಷ್ಟಿವೆ, ಸಾಹಿತ್ಯದಲ್ಲಿ ಎಷ್ಟಿವೆ ಎನ್ನುವುದು ಬೇರೆಯೇ ಚರ್ಚೆಯ ವಿಷಯ) ಸಂಸ್ಕೃತವನ್ನು ತಾಯಿ ಎಂದು ವಿಶೇಷವಾಗಿ ಗೌರವಿಸಬೇಕಾದ ಅಗತ್ಯವಿಲ್ಲ. ಗೌರವಿಸುವುದು ಬೇಡ ಎಂದರೆ ಅಗೌರವ ತೋರಿಸಬೇಕೂ ಅಂತಾನೂ ಅಲ್ಲ! ಸಂಸ್ಕೃತ ಭಾಷೆಯ ಶ್ರೀಮಂತಿಕೆಯ ಕಾರಣಕ್ಕಾಗಿ, ಅದರೊಳಗಿರುವ ಸಾಹಿತ್ಯ ಭಂಡಾರ, ಅದರ “ಸಂಯಕ್ ಕೃತ” ಸ್ವಭಾವಕ್ಕಾಗಿ ಅದನ್ನು ಗೌರವಿಸುವುದನ್ನೂ, ಕಲಿಯುವುದನ್ನೂ ಯಾರೂ ವಿರೋಧಿಸುವುದಿಲ್ಲ. ನುಡಿಯೊಂದಕ್ಕೆ ಮತ್ತೊಂದು ನುಡಿಯನ್ನು ಶತ್ರು ಎಂಬಂತೆ ಬಿಂಬಿಸುವುದನ್ನು ಮಾತ್ರಾ ಬಾಲಿಶವಾದ ಮನಸ್ಥಿತಿ ಎನ್ನಬಹುದಷ್ಟೇ!

ಇಂಗ್ಲೀಷ್ ಇಲ್ಲದೆ ಬದುಕಬಹುದು ಎನ್ನುವ ಮಾತು ಭಾವುಕವಾಗಿ ಆಡಬಹುದು ಅಷ್ಟೇ! ಇವತ್ತು ಇಂಗ್ಲೀಷ್ ಇಲ್ಲದೆ ಒಬ್ಬನೇ ಒಬ್ಬನಿಗೂ ಭಾರತದಲ್ಲಿ ಬದುಕಲು ಸಾಧ್ಯವಿಲ್ಲ! ಹಿಂದೀಯನ್ನು ಇಂಗ್ಲೀಷಿನ ಸಮನಾಗಿ ನಿಲ್ಲಿಸುತ್ತಿರುವ ಮೂರ್ಖರು ತಿಳಿಯಬೇಕಾದ್ದು ಏನೆಂದರೆ ಇಂಗ್ಲೀಷಿಗಿರುವ ಉಪಯುಕ್ತತೆಯ ಎದುರು ಹಿಂದೀಯೂ ಸೇರಿದಂತೆ ಎಲ್ಲಾ ಭಾರತೀಯ ಭಾಷೆಗಳೂ ತೀರಾ ಕೆಳಮಟ್ಟದಲ್ಲಿವೆ ಎನ್ನುವುದು ವಾಸ್ತವ. ಇಂಗ್ಲೀಷಿಗಿಂತಾ ಹಿಂದೀ ಹೆಚ್ಚು ಉಪಯುಕ್ತವಾಗಿದ್ದಿದ್ದರೆ ಯಾಕಾಗಿ ಹಿಂದೀ ನಾಡುಗಳಲ್ಲೂ ಜನತೆ, ಇಂಗ್ಲೀಷ್ ಮಾಧ್ಯಮದ ಕಲಿಕೆಯ ಹಿಂದೆ ಬಿದ್ದಿದ್ದಾರೆ? ಕನ್ನಡಿಗರು ಇಂದು ಕಲಿಕೆ, ದುಡಿಮೆ, ವ್ಯವಹಾರಗಳಿಗಾಗಿ ಇಂಗ್ಲೀಷಿನ ಮೇಲೆ ಅವಲಂಬಿತರಾಗಿದ್ದರೆ ಅದನ್ನು ಕಡಿಮೆ ಮಾಡಿಕೊಳ್ಳಬೇಕು ಅನ್ನುವ ಮಾತು ಒಪ್ಪತಕ್ಕದ್ದೇ ಆಗಿದೆ. ಹೀಗೆ ಕಡಿಮೆ ಮಾಡಿಕೊಳ್ಳುವುದು ಎಂದರೆ ಆ ಜಾಗದಲ್ಲೆಲ್ಲಾ ಕನ್ನಡ ಬರುವುದು ಎಂದು ಅರ್ಥವೇ ಹೊರತು ಇಂಗ್ಲೀಷಿನ ಬದಲಾಗಿ ಹಿಂದೀ/ ಸಂಸ್ಕೃತವನ್ನು ತಂದು ಕೂಡಿಸುವುದು ಎಂದಲ್ಲ! ಕಣ್ಣಿಗೆ ಚುಚ್ಚುತ್ತಿರುವ ಸೂಜಿ ಪಕ್ಕದ ಮನೆಯದ್ದಾದರೂ, ನಮ್ಮ ಮನೆಯದ್ದಾದರೂ ಒಂದೇ ಅಲ್ಲವೇನು? ಅಥವಾ ಬಂಗಾರದ ಸೂಜಿ ಎಂದು ಕಡಿಮೆ ನೋವಾಗುವುದೇನು?

ಕಾಶ್ಮೀರದಿಂದ ಕನ್ಯಾಕುಮಾರಿಯವರೆಗೆ ಹಿಂದೀಯನ್ನು ಎಲ್ಲರೂ ಅರ್ಥಮಾಡಿಕೊಳ್ಳುತ್ತಾರೆ ಎನ್ನುವುದು ಹಸಿ ಸುಳ್ಳು! ಮೊನ್ನೆ ತಾನೇ ದಾವಣಗೆರೆಯ ಸಮಾವೇಶದಲ್ಲಿ ಮೋದಿಯ ಹಿಂದೀ ಭಾಷಣ ಅರ್ಥವಾಗುತ್ತಿಲ್ಲ ಎಂದು ತಡಬಡಿಸಿದ ರೈತರ ಅಭಿಪ್ರಾಯ ಇದಕ್ಕೊಂದು ಉದಾಹರಣೆ! ಹತ್ತನೇ ತರಗತಿಯ ಪರೀಕ್ಷೆಗಳಲ್ಲಿ ಇಂದಿಗೂ ಹಿಂದೀ ಭಾಷೆಯ ಪರೀಕ್ಷೆಯಲ್ಲಿ ನಪಾಸಾಗುವವರು ದೊಡ್ಡಸಂಖ್ಯೆಯಲ್ಲಿದ್ದಾರೆ. ಎಪ್ಪತ್ತು ವರ್ಷಗಳ ಕಾಲ ಕೋಟಿ ಕೋಟಿ ಹಣ ಖರ್ಚು ಮಾಡಿ ಹಿಂದೀ ಪ್ರಚಾರಕ್ಕೊಂದು ಇಲಾಖೆ ಕಟ್ಟಿ, ಪ್ರತಿ ಇಲಾಖೆಯಲ್ಲೊಂದು ಹಿಂದೀ ಪ್ರಚಾರ ಇಲಾಖೆ ಕಟ್ಟಿ, ಕಂಡ ಕಂಡಲ್ಲಿ ಹಿಂದೀ ತುರುಕಿ, ಹಿಂದೀ ಕಲಿಕೆಯನ್ನು ಶಾಲೆಗಳಲ್ಲಿ ಕಡ್ಡಾಯಗೊಳಿಸಿ ಈಗ ದೇಶದ ಎಲ್ಲರಿಗೂ ಹಿಂದೀ ಬರುತ್ತೆ, ಅದಕ್ಕಾಗಿ ಹಿಂದೀ ಬಳಸಿ ಅನ್ನೋ ಮಾತಾಡೋದು ನಿಜಕ್ಕೂ ಕ್ರೌರ್ಯ! ’ಭಾರತದ ಮೇಲೆ ಪ್ರೀತಿ ಇದ್ದರೆ ಹಿಂದೀ ಕಲೀರಿ’ ಅನ್ನೋರು ನಿಜವಾದ ದೇಶವಿರೋಧಿಗಳು. ವೈವಿಧ್ಯತೆಯನ್ನು ಅಳಿಸಿ ಎಲ್ಲೆಡೆ ಹಿಂದೀ ಸಾಮ್ರಾಜ್ಯ ಸ್ಥಾಪಿಸಲು ಹವಣಿಸೋರನ್ನು ಜನರು ಅಟ್ಟಾಡಿಸಿಕೊಂಡು ಹೊಡೆಯೋ ನಾಳೆಗಳು ಬಂದರೂ ಆಶ್ಚರ್ಯವಿಲ್ಲ! ಅದಕ್ಕೆ ಮೊದಲು ಇಂಥವರು ತಾಯಿ, ತಂಗಿ ಅಂತಾ ಕಥೆ ಹೊಡೆಯೋದನ್ನು ಬಿಟ್ಟು ’ಕನ್ನಡನಾಡಲ್ಲಿ ಕನ್ನಡವೇ ಸಾರ್ವಭೌಮ ಭಾಷೆ, ಕನ್ನಡಿಗರು ಕನ್ನಡವನ್ನು ಕಲಿಕೆ ದುಡಿಮೆ ಆಡಳಿತವೇ ಮೊದಲಾದ ಎಲ್ಲೆಡೆ ಬಳಸುವಂತೆ ಚೆನ್ನಾಗಿ ಕಟ್ಟಿಕೊಳ್ಳಿ’ ಎನ್ನುವ ಮಾತಾಡುವುದು ಸ್ವಲ್ಪ ವಿವೇಕ ಅನ್ನಿಸುತ್ತದೆ!

Advertisements

Posted on December 11, 2016, in ಗುಂಪಿಸದ್ದು. Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: