ಡಬ್ಬಿಂಗ್: ಭೂತವೂ ಅಲ್ಲ ಭವಿಶ್ಯವೂ ಅಲ್ಲ.. ವರ್ತಮಾನ!

vishwavani_dubbing

(ಚಿತ್ರಕೃಪೆ: ವಿಶ್ವವಾಣಿ)

“ಡಬ್ಬಿಂಗ್ ಎಂಬುದು ಭೂತವೋ? ಭವಿಶ್ಯವೋ?” ಎಂಬ ಹೆಸರಿನ ಬರಹವೊಂದು ಇಂದಿನ ವಿಶ್ವವಾಣಿ ಪತ್ರಿಕೆಯಲ್ಲಿ ಪ್ರಕಟವಾಗಿದೆ. ಮೇಲುನೋಟಕ್ಕೆ ಬಾಯಿಮಾತಿಗೆ ನಿಷ್ಪಕ್ಷಪಾತ ಬರಹ, ಚರ್ಚೆಯೊಂದಕ್ಕೆ ಮುನ್ನುಡಿ ಎನ್ನುವಂತೆ ಬರೆದಿದ್ದರೂ ಸದರಿ ಬರಹದ ಆಳದಲ್ಲಿ ಬರಹಗಾರರು ಡಬ್ಬಿಂಗ್ ಬಗ್ಗೆ ಹೊಂದಿರುವ ಪೂರ್ವಾಗ್ರಹ, ಗೊಂದಲ ಮತ್ತು ಸರಿಯಾದ ಮಾಹಿತಿಯ ಕೊರತೆ ಎದ್ದು ಕಾಣುತ್ತಿದೆ. ಹಾಗಾಗಿ ಈ ಬರಹದ ಬಗ್ಗೆ “ಡಬ್ಬಿಂಗ್: ಕನ್ನಡಿಗರ ಆಯ್ಕೆ ಸ್ವಾತಂತ್ರದ ಹಕ್ಕೊತ್ತಾಯ” ಪುಸ್ತಕ ಬರೆದ ಮೇಲೂ, ಆ ಪುಸ್ತಕದಲ್ಲೇ ಇವರ ಎಲ್ಲಾ ಗೊಂದಲ, ಪೂರ್ವಾಗ್ರಹಗಳಿಗೆ ಉತ್ತರ ಮತ್ತು ಅಗತ್ಯ ಮಾಹಿತಿಗಳನ್ನು ನೀಡಿದ್ದರೂ ಮತ್ತೊಮ್ಮೆ ಬರೆಯಬೇಕಾಗಿದೆ.

ಶ್ರೀಯುತರ ಬರಹ ಆರಂಭವಾಗಿರುವುದೇ ಅಸಹನೆ ತುಂಬಿದ ವ್ಯಂಗ್ಯದೊಂದಿಗೆ… ಇರಲಿ.. ಸಿನಿಮಾ ಹೆಸರುಗಳ ಬಗ್ಗೆ ಇವರು ವ್ಯಕ್ತಪಡಿಸಿರುವ ಅನಿಸಿಕೆಗಳನ್ನು ಬದಿಗಿಟ್ಟು ಮುಂದೆ ನೋಡೋಣ. ಸಿ ಸಿ ಐ ಅಂದರೆ ಭಾರತೀಯ ಸ್ಪರ್ಧಾ ಆಯೋಗವು ಡಬ್ಬಿಂಗ್ ನಿಶೇಧ ಎನ್ನುವುದು ಕಾನೂನು ಬಾಹಿರ ಎನ್ನುವ ತೀರ್ಪನ್ನು ನೀಡಿಲ್ಲ. ಬದಲಿಗೆ ಕರ್ನಾಟಕದಲ್ಲಿರುವ ಚಿತ್ರೋದ್ಯಮಕ್ಕೆ ಸಂಬಂಧಿಸಿದ ಕೆಲವು ಸಂಸ್ಥೆಗಳು ಡಬ್ ಆದ ಕಂಟೆಂಟನ್ನು ಪ್ರಸಾರ ಮಾಡಲು ಕಾನೂನು ಬಾಹಿರವಾಗಿ ತಡೆಯೊಡ್ಡುತ್ತಿರುವುದು ಸ್ಪರ್ಧಾನಿಯಮಗಳನ್ನು ಕಡೆಗಣಿಸಿ, ಹತೋಟಿಕೂಟವಾಗಿ ನಡೆದುಕೊಂಡಿರುವುದು ಸಾಬೀತಾಗಿದೆ ಎಂದು ತೀರ್ಪಿತ್ತು ಆ ಸಂಸ್ಥೆಗಳಿಗೆ ದಂಡ ವಿಧಿಸಿ… ತಕ್ಷಣದಿಂದಲೇ ಅಂತಹ ನಡೆಗಳನ್ನು ಕೈಬಿಡಬೇಕೆಂದು (ಸೀಜ್ & ಡಿಸಿಸ್ಟ್) ಕಟ್ಟಪ್ಪಣೆ ಮಾಡಿದೆ. ಬರಹಗಾರರು ಹೇಳುವಂತೆ ಕನ್ನಡ ಚಿತ್ರರಂಗದ ಅನೇಕರು ರಾತ್ರೋರಾತ್ರಿ ಹಿಟ್ ಮತ್ತು ಕೆಟ್ ಚಿತ್ರಗಳನ್ನು ಡಬ್ ಮಾಡಿಸಿ ತೆರೆಗೆ ತರಲು ರೆಡಿಯಾಗಿಬಿಟ್ಟಿದ್ದಾರೆ ಎಂಬುದೇ ನಿಜವಾದರೆ ದಯಮಾಡಿ ಅಂತಾ ಚಿತ್ರಗಳ/ ನಿರ್ಮಾಪಕರ ಪಟ್ಟಿಯನ್ನು ಬಿಡುಗಡೆ ಮಾಡಲಿ. ಬೇಗ ಸಿನಿಮಾ ಬಿಡುಗಡೆ ಮಾಡಿಸೋಣವಂತೆ!

ಇನ್ನು ಡಬ್ಬಿಂಗ್ ವಿರೋಧಿಗಳ ಪಟ್ಟಿಯಲ್ಲಿ ಕರ್ನಾಟಕ ರಕ್ಷಣಾ ವೇದಿಕೆಯ ನಾರಾಯಣ ಗೌಡರ ಹೆಸರನ್ನು ಸೇರಿಸಿ ಬರೆದಿರುವನ್ನು ನೋಡಿದರೆ ಬರಹಗಾರರ ಉದ್ದೇಶವೇ ಗೊಂದಲ ಹುಟ್ಟಿಸುವುದು ಎಂಬಂತೆ ತೋರುತ್ತದೆ. ಡಬ್ಬಿಂಗ್ ಕನ್ನಡ ನಾಡಿಗೆ ಉಂಟು ಮಾಡುವ ಸಾಧಕ ಬಾಧಕಗಳ ಬಗ್ಗೆ ಚರ್ಚೆ ಮಾಡಿದಂದಿನಿಂದ ಇದುವರೆವಿಗೂ ಡಬ್ಬಿಂಗ್ ಬಗ್ಗೆ ತಟಸ್ಥ ನಿಲುವು ತೋರಿ ಇದನ್ನು ಒಪ್ಪುವುದು ಬಿಡುವುದು ಕನ್ನಡ ಜನತೆಗೆ ಸೇರಿದ್ದು ಎಂಬ ನಿಲುವನ್ನಲ್ಲದೆ ಬೇರಾವ ನಿಲುವನ್ನು ತೋರಿರದ ನಾರಾಯಣ ಗೌಡರ ಬಗ್ಗೆ ಯಾಕಾಗಿ ಹುಸಿಯಾಡಿದರೋ ದೇವರೇ ಬಲ್ಲ! ಇನ್ನು ಡಬ್ಬಿಂಗ್ ವಿರೋಧಿಗಳು ಸುಮ್ಮನಾಗಿರುವುದರ ಕಾರಣ ತಿಳಿದಿಲ್ಲ ಎಂದಿದ್ದಾರೆ.. ಅವರ ಮೌನಕ್ಕೆ ಕಾರಣವಾಗಿರುವುದು ನ್ಯಾಯಾಲಯ ಮತ್ತು ಸಿಸಿಐಗಳ ನಿಲುವು, ಡಬ್ಬಿಂಗ್ ವಿರೋಧ ಎನ್ನುವುದು ಕಾನೂನು ಬಾಹಿರವಾದದ್ದು ಎಂಬ ತಿಳಿವು, ಕನ್ನಡಿಗರಲ್ಲಿ ಡಬ್ಬಿಂಗ್ ವಿರೋಧಿ ಹತೋಟಿಕೂಟದ ಬಗ್ಗೆ ಮೂಡಿರುವ ಅರಿವುಗಳೇ ಆಗಿವೆ.

ಡಬ್ಬಿಂಗ್ ಬಂದರೆ ಮೂಲಚಿತ್ರದಲ್ಲಿ, ಮೂಲ ಭಾಷೆಯ ಸೊಗಡನ್ನು ಸವಿಯಲು ಸಾಧ್ಯವಾಗದು ಎನ್ನುವ ರಸಗ್ರಾಹಿಯ ಕಾಳಜಿ ತೋರಿದ್ದಾರೆ. ಡಬ್ಬಿಂಗ್ ಚಿತ್ರ ಬಿಡುಗಡೆಯಾದರೆ ಕನ್ನಡದಲ್ಲೇ ಪರಭಾಷೆಯ ಚಿತ್ರಗಳನ್ನು ನೋಡಬೇಕೆನ್ನುವವರಿಗೆ ಅದು ಸಾಧ್ಯವಾಗುತ್ತದೆ..ಅಂತೆಯೇ ಮೂಲಚಿತ್ರವನ್ನು ಮೂಲಭಾಷೆಯಲ್ಲೇ ನೋಡುವವರನ್ನು ಅದು ತಡೆಯುವುದಿಲ್ಲ! ಹಾಗಾಗಿ ರಸಗ್ರಾಹಿಗಳು ಮೂಲಭಾಷೆಯಲ್ಲಿ ನೋಡಿ ತಮಗೆ ಬೇಕಾದ ರಸಾನುಭವವನ್ನು ಪಡೆದುಕೊಳ್ಳುವುದಕ್ಕೆ ಅಡ್ಡಿಯಾದೀತು ಎಂದು ಆತಂಕ ಪಡಬೇಕಾಗಿಲ್ಲ.

ತುಟಿಚಲನೆ ಹೊಂದದೆ ಅಸಹ್ಯವೆನ್ನಿಸಿದರೆ ಖಂಡಿತಾ ಜನರು ಅಂಥಾ ಅಸಹ್ಯವನ್ನು ಸಹಿಸೋಲ್ಲ ಬಿಡಿ. ಇಷ್ಟಕ್ಕೂ ದಬ್ಬಿಂಗ್ ಚಿತ್ರಗಳನ್ನು ನೋಡಲೇಬೇಕೆಂಬ ಕಟ್ಟುಪಾಡನ್ನು ಯಾರೂ ಮಾಡುತ್ತಿಲ್ಲವಲ್ಲ. ಈ ರೀತಿಯ ವಾದಕ್ಕೆ ಉತ್ತರವೆಂಬಂತೆ ಲಿಪ್ ಸಿಂಕಿಂಗ್ ಟೆಕ್ನಾಲಜಿ ಎನ್ನುವುದು ಮೂಡಿಬಂದಿದೆ. ಯಾರಿಗಾದರೋ ತಾವು ಡಬ್ ಮಾಡಿದ ಚಿತ್ರ ಗೆಲ್ಲಲು ಇದು ಸಹಕಾರಿ ಎನ್ನಿಸಿದರೆ ಆ ತಂತ್ರಜ್ಞಾನವನ್ನೂ ಬಳಸಿಕೊಳ್ಳದೆ ಬಿಡುತ್ತಾರೆಯೇ? ಇಷ್ಟಕ್ಕೂ ಇಂದಿನ ಕನ್ನಡ ಚಿತ್ರಗಳಲ್ಲಿ ದಂಡಿ ದಂಡಿಯಾಗಿ ನಟಿಸುತ್ತಿರುವ ಪರಭಾಷಾ ನಟನಟಿಯರ ತುಟಿಚಲನೆ ಮತ್ತು ಸಂಭಾಷಣೆ ಪ್ರತಿಬಾರಿ ಸಿಂಕ್ ಆಗುತ್ತಿದೆಯೇ? ಎಷ್ಟೋ ನಟನಟಿಯರು ಸಂಭಾಷಣೆಯ ಬದಲು “a,b,c,d,e…” ಎಂದು ಹೇಳುವುದೂ ಇದೆ ಎನ್ನುವುದು ಲಿಪ್ ಸಿಂಕಿಂಗ್ ವಾದದ ಪೊಳ್ಳುತನ ತೋರುತ್ತದೆ. ಇಷ್ಟರ ಮೇಲೆ ಡಬ್ ಆದ  ಚಿತ್ರಗಳನ್ನು ಲಿಪ್ ಸಿಂಕಿಂಗ್ ಸರಿಯಿಲ್ಲ ಎನ್ನುವ ಕಾರಣಕ್ಕೆ ನೋಡದಿರುವ ಸ್ವಾತಂತ್ರ್ಯ ನೋಡುಗರಿಗೆ ಇದ್ದೇ ಇದೆಯಲ್ಲವೇ!

ಪರಭಾಷೆಯ ನಟರನ್ನು, ಊರು, ದೃಶ್ಯ, ಬೋರ್ಡು ಮೊದಲಾದವುಗಳನ್ನೂ, ಅವರು ಅವರದ್ಯಾವುದೋ ಬಾವುಟ ಹಿಡಿದುಕೊಂಡು ಹಾಡುವುದನ್ನೂ ನಾವ್ಯಾಕೆ ಅರಗಿಸಿಕೊಳ್ಳಬೇಕು/ ಸಹಿಸಿಕೊಳ್ಳಬೇಕು ಎನ್ನುವರ್ಥದ ಮಾತುಗಳನ್ನು ಬರೆದಿದ್ದಾರೆ. ನಿಜಾ. ನಿಮಗೆ ಇಷ್ಟವಿಲ್ಲದಿದ್ದರೆ ನೋಡಬೇಡಿ ಬಿಡಿ. ಇಂದಿನ ತಂತ್ರಜ್ಞಾನದಲ್ಲಿ ಡಬ್ ಮಾಡುವಾಗ ಹಿನ್ನೆಲೆಯ ದೃಶ್ಯಗಳನ್ನು ತಿದ್ದುವ ಅವಕಾಶವೂ ಇದೆ ಎನ್ನುವುದನ್ನು ಮರೆಯಬಾರದು ಅಷ್ಟೆ.. ಇಷ್ಟಕ್ಕೂ ನೋಡುಗ ಮಹಾಪ್ರಭು ಅಂಥಾ ದೃಶ್ಯಗಳಿರುವ ಸಿನಿಮಾಗಳನ್ನು ನೋಡಬೇಕೇ ಬೇಡವೇ,  ಗೆಲ್ಲಿಸಬೇಕೇ ಸೋಲಿಸಬೇಕೇ ಎಂಬ ತೀರ್ಪನ್ನು ಗಲ್ಲಾಪೆಟ್ಟಿಗೆಯ ಲೆಕ್ಕದ ಮೂಲಕವೇ ಕೊಡುತ್ತಾನಲ್ಲವೇ!

ಇಂಥಿಂಥ ಕಾರ್ಯಕ್ರಮಗಳು ಡಬ್ ಆಗಿ ಬರಬಹುದು, ಇಂಥವು ಬರಬಾರದು ಎನ್ನಲು ನಾವು ಯಾವೂರಿನ ದೊಣೆನಾಯಕರು? ನಿರ್ಮಾಪಕ ತನಗೆ ಯಾವುದು ಲಾಭ ತಂದುಕೊಡಬಲ್ಲದು ಎನ್ನಿಸುತ್ತದೆಯೋ ಅದನ್ನು ಮಾಡುತ್ತಾನೆ. ಇದುವರೆವಿಗೂ ಚಿತ್ರೋದ್ಯಮ ನಡೆದಿರುವುದೇ ಹಾಗಲ್ಲವೇ? ಬರೀ ಚಿತ್ರೋದ್ಯಮವೇಕೆ, ಉದ್ಯಮಗಳು ನಡೆಯುವುದೇ ಹಾಗಲ್ಲವೇ? ನಾವಿಲ್ಲೆಲ್ಲೋ ಕೂತು ಮೊದಲಿಗೆ ಒಳ್ಳೇ ಚಿತ್ರಗಳು ಬರುತ್ತವೆ, ಆಮೇಲೆ ಕಳಪೆ ಸೆಕ್ಸ್ ಚಿತ್ರಗಳೇ ಬರುತ್ತವೆ ಎಂದು ಭವಿಶ್ಯವಾಣಿ ನುಡಿಯುವುದು ಎಷ್ಟು ಸರಿ? ಇಷ್ಟಕ್ಕೂ ಅದೇ ಆಗುವುದಾದರೆ ನೋಡುಗರು ಅಂಥಾ ಚಿತ್ರಗಳನ್ನು ಗೆಲ್ಲಿಸುವ/ ಸೋಲಿಸುವ ಅವಕಾಶವನ್ನಂತೂ ಹೊಂದಿರುತ್ತಾನಲ್ಲವೇ? ನೋಡುಗರನ್ನು ದಡ್ಡರಂತೆಣಿಸಿ ಇವರು ಇಂಥದ್ದನ್ನು ನೋಡಬೇಕು, ಇಂಥದ್ದನು ನೋಡಬಾರದು ಎಂದು ಅವರ ಪರವಾಗಿ ತೀರ್ಪುಕೊಡುವ ಹಕ್ಕನ್ನು ಯಾರಿಗಾದರೋ ಯಾರು ಕೊಟ್ಟಿದ್ದಾರೆ? ಜನರನ್ನು ತಲೆಯಿಲ್ಲದ ಕುರಿಗಳು ಎಂದು ಭಾವಿಸಿ ನೀಡುವ ಇಂಥಾ ನಿರ್ಣಯಾತ್ಮಕ ಹೇಳಿಕೆಗಳ ಹಿಂದೆ ಹತೋಟಿಕೂಟದ ಹುನ್ನಾರವಿರುವಂತೆ ತೋರುವುದಿಲ್ಲವೇ! ಡಬ್ಬಿಂಗಿಗೆ ಬದಲಿಯಾಗಿ ಪ್ಯಾರಾಡಬ್ಬಿಂಗ್, ಸಬ್ ಟೈಟಲ್ ಏರ್ಪಾಟುಗಳು ಬರಲಿ, ಕನ್ನಡದಲ್ಲಿ ಸ್ವಮೇಕ್ ಮಾತ್ರಾ ಬರಲಿ, ರಿಮೇಕು ನಿಲ್ಲಲಿ, ಸ್ಟಾರ್ ನಟರುಗಳ ಕೊಬ್ಬು ಇಳಿಯಲಿ ಅಂತೆಲ್ಲಾ ಮಾತಾಡುವುದು ಬಾಲಿಶ. ಕನ್ನಡದಲ್ಲಿ ಸ್ವಮೇಕ್ ಬರಲಿ, ರಿಮೇಕ್ ಬರಲಿ, ಡಬ್ಬಿಂಗ್ ಬರಲಿ, ನಮ್ಮ ನಟರು ಪರಭಾಷೆಯಲ್ಲೂ ಮಿಂಚಲಿ, ಬೇಕಾದಷ್ಟು ಸಂಪಾದಿಸಲಿ… ನೋಡುಗರ ಅವಕಾಶಗಳ ಬಾಗಿಲು ಎಣೆಯಿರದಷ್ಟು ವಿಸ್ತಾರವಾಗಲಿ.. ಅಷ್ಟೇ!

ಡಬ್ಬಿಂಗ್ ಬರುವುದರಿಂದ ಕನ್ನಡಿಗರಿಗೆ ತಮ್ಮ ನೆಚ್ಚಿನ ಕಾರ್ಯಕ್ರಮಗಳನ್ನು/ ಚಿತ್ರಗಳನ್ನು ತಮ್ಮ ತಾಯ್ನುಡಿಯಲ್ಲಿ ನೋಡುವ ಅವಕಾಶ ಸಿಗುತ್ತದೆ. ದಶಕಗಳಿಂದ ಕಾನೂನು ಬಾಹಿರವಾಗಿ ಕಸಿದುಕೊಂಡಿದ್ದ ಆಯ್ಕೆಯ ಸ್ವಾತಂತ್ರ್ಯ ದಕ್ಕುತ್ತದೆ. ಡಬ್ ಆದ ಚಿತ್ರಗಳು ಮಾರುಕಟ್ಟೆಯಲ್ಲಿ ಗೆಲ್ಲುವುದರಿಂದ ಕನ್ನಡ ಚಿತ್ರೋದ್ಯಮಕ್ಕೆ ನಾಳೆ ಏನಾಗುತ್ತದೋ ಬಲ್ಲವರಿಲ್ಲ. ಅದು ಚಿತ್ರೋದ್ಯಮ ಸ್ಪರ್ಧೆಯನ್ನು ಗುಣಾತ್ಮಕವಾಗಿ ಹೇಗೆ ಎದುರಿಸುತ್ತದೆ ಎಂಬುದರ ಮೇಲೆ ನಿಂತಿದೆ. ಆದರೆ ಕನ್ನಡ ನಾಡು, ಕನ್ನಡಿಗ ಸಮಾಜ ಚಿತ್ರೋದ್ಯಮಕ್ಕಿಂತ ಬಹಳ ದೊಡ್ಡದು ಮತ್ತು ಮುಖ್ಯವಾದದ್ದು ಎನ್ನುವುದನ್ನು ಲೆಕ್ಕಕ್ಕಿಟ್ಟುಕೊಂಡು ನೋಡಿದರೆ ನಾಳೆಗಳು ಸಕಾರಾತ್ಮಕವಾಗೇ ಕಾಣುತ್ತವೆ.

Advertisements

Posted on January 17, 2017, in ಗುಂಪಿಸದ್ದು and tagged , . Bookmark the permalink. Leave a comment.

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s

%d bloggers like this: